שירת הים

וַיּושַׁע ה בַּיּום הַהוּא אֶת יִשְׂרָאֵל מִיַּד מִצְרָיִם. וַיַּרְא יִשְׂרָאֵל אֶת מִצְרַיִם מֵת עַל שְׂפַת הַיָּם:
וַיַּרְא יִשְׂרָאֵל אֶת הַיָּד הַגְּדלָה אֲשֶׁר עָשָׂה ה בְּמִצְרַיִם וַיִּירְאוּ הָעָם אֶת ה.
וַיַּאֲמִינוּ בה וּבְמשֶׁה עַבְדּו:

אָז יָשִׁיר משֶׁה וּבְנֵי יִשְׂרָאֵל אֶת הַשִּׁירָה הַזּאת לה וַיּאמְרוּ לֵאמר.
אָשִׁירָה לה כִּי גָאה גָּאָה
סוּס וְרכְבו רָמָה בַיָּם:
עָזִּי וְזִמְרָת יָהּ וַיְהִי לִי לִישׁוּעָה.
זֶה אֵלִי וְאַנְוֵהוּ אֱלהֵי אָבִי וַאֲרמְמֶנְהוּ:
ה אִישׁ מִלְחָמָה. ה שְׁמו:
מַרְכְּבות פַּרְעה וְחֵילו יָרָה בַיָּם.
וּמִבְחַר שָׁלִשָׁיו טֻבְּעוּ בְיַם סוּף:
תְּהמת יְכַסְיֻמוּ. יָרְדוּ בִמְצולת כְּמו אָבֶן:
יְמִינְךָ ה נֶאְדָּרִי בַּכּחַ.
יְמִינְךָ ה תִּרְעַץ אויֵב:
וּבְרב גְּאונְךָ תַּהֲרס קָמֶיךָ.
תְּשַׁלַּח חֲרנְךָ יאכְלֵמו כַּקַּשׁ:
וּבְרוּחַ אַפֶּיךָ נֶעֶרְמוּ מַיִם נִצְּבוּ כְמו נֵד נזְלִים. קָפְאוּ תְהמת בְּלֶב יָם:
אָמַר אויֵב אֶרְדּף אַשִּׂיג אֲחַלֵּק שָׁלָל.
תִּמְלָאֵמו נַפְשִׁי אָרִיק חַרְבִּי תּורִישֵׁמו יָדִי:
נָשַׁפְתָּ בְרוּחֲךָ כִּסָּמו יָם.
צָלֲלוּ כַּעופֶרֶת בְּמַיִם אַדִּירִים:
מִי כָמכָה בָּאֵלִם ה
מִי כָּמכָה נֶאְדָּר בַּקּדֶשׁ.
נורָא תְהִלּת עשֵׂה פֶלֶא:
נָטִיתָ יְמִינְךָ תִּבְלָעֵמו אָרֶץ:
נָחִיתָ בְחַסְדְּךָ עַם זּוּ גָּאָלְתָּ.
נֵהַלְתָּ בְעָזְּךָ אֶל נְוֵה קָדְשֶׁךָ:
שָׁמְעוּ עַמִּים יִרְגָּזוּן.
חִיל אָחַז ישְׁבֵי פְּלָשֶׁת:
אָז נִבְהֲלוּ אַלּוּפֵי אֱדום אֵילֵי מואָב
יאחֲזֵמו רָעַד.
נָמגוּ כּל ישְׁבֵי כְנָעַן:
תִּפּל עֲלֵיהֶם אֵימָתָה וָפַחַד
בִּגְדל זְרועֲךָ יִדְּמוּ כָּאָבֶן.
עַד יַעֲבור עַמְּךָ ה עַד יַעֲבר עַם זוּ קָנִיתָ:
תְּבִאֵמו וְתִטָּעֵמו בְּהַר נַחֲלָתְךָ
מָכון לְשִׁבְתְּךָ פָּעַלְתָּ ה.
מִקְדָּשׁ אֲדנָי כּונְנוּ יָדֶיךָ:
ה יִמְלךְ לְעלָם וָעֶד:
ה יִמְלךְ לְעלָם וָעֶד:
ה מַלְכוּתֵיהּ קָאִים לְעָלַם וּלְעָלְמֵי עָלְמַיָּא:

כִּי בָא סוּס פַּרְעה בְּרִכְבּו וּבְפָרָשָׁיו בַּיָּם
וַיָּשֶׁב ה עֲלֵהֶם אֶת מֵי הַיָּם.
וּבְנֵי יִשְׂרָאֵל הָלְכוּ בַיַּבָּשָׁה בְּתוךְ הַיָּם:
כִּי לה הַמְּלוּכָה. וּמושֵׁל בַּגּויִם:
וְעָלוּ מושִׁעִים בְּהַר צִיּון לִשְׁפּט אֶת הַר עֵשָׂו. וְהָיְתָה לה הַמְּלוּכָה:
וְהָיָה ה לְמֶלֶךְ עַל כָּל הָאָרֶץ.
בַּיּום הַהוּא יִהְיֶה ה אֶחָד וּשְׁמו אֶחָד: